(ថ្ងៃទី១)—(Day-1)

ថ្ងៃទី៦ ខែឧសភា ឆ្នាំ២០២៤ សមាគមបណ្តាញយុវជនកម្ពុជា និងអង្គការសង្គមស៊ីវិលចំនួន១៣ ស្ថាប័ន បានផ្តើមការប្រារព្ធកម្មវិធីបរិស្ថានពិភពលោកឆ្នាំ២០២៤ រយៈពេល ៣០ថ្ងៃ ចាប់ពីថ្ងៃទី៦ ខែឧសភា ដល់ថ្ងៃទី៥ ខែមិថុនា ឆ្នាំ២០២៤ ក្រោមមូលបទ ស្តីពី “សុខុមាលភាពនៃភពផែនដី គឺជាការទទួលខុសត្រូវរបស់យើងទាំងអស់គ្នា”។

នៅក្នុងកំឡុងពេលនៃការប្រារព្ធទិវាបរិស្ថានពិភពលោកនៅឆ្នាំ២០២៤ សមាគម អង្គការសង្គមស៊ីវិល សហគមន៍មូលដ្ឋាន និងក្រុមយុវជននៅក្នុងប្រទេសកម្ពុជា នឹងមានការរៀបចំសកម្មភាពព្រឹត្តិការណ៍ជិះកង់ ការប្រារព្ធយុទ្ធនាការនៅលើបណ្តាញសង្គម ការចួបជុំប្រារព្ធនៅតាមសហគមន៍ ការដាំកូនឈើ ដើមកោងកាង និងវេទិកាបរិស្ថាន នៅថ្ងៃទី២ ខែមិថុនា ឆ្នាំ២០២៤នៅរាជធានីភ្នំពេញ។

ជាថ្ងៃដំបូងនៃការប្រារព្ធទិវាបរិស្ថានពិភពលោក “ព្រឹត្តិការណ៍ជិះកង់ ១០០០គីឡូម៉ែត្រដើម្បីបរិស្ថាន” ដែលមានអ្នកជិះកង់ចំនួន ២៥នាក់ជិះកង់ក្នុងរយៈចំងាយវែងរហូតដល់ជិត ១០០០គីឡូម៉ែត្រ រយៈពេល២០ថ្ងៃ ដោយចាប់ផ្តើមចេញពីភាគឦសាន ត្រង់ខេត្តរតនគិរី ឆ្ពោះទៅបញ្ចប់នៅភាគនិរតីនៃប្រទេសកម្ពុជា ក្នុងខេត្តកំពត នឹងផ្តើមជាសកម្មដំបូងនៃការប្រារព្ធទិវាបរិស្ថានពិភពលោកឆ្នាំ២០២៤។

អាស្រ័យដូចមានក្នុងសេចក្តីប្រកាសព័ត៌មានខាងលើនេះ សូមអាជ្ញាធរ អ្នកសារព័ត៌មាន សហគមន៍ និងសាធារណជន អញ្ជើញចូលរួម និងផ្តល់កិច្ចសហការ ដើម្បីរួមគ្នាលើកកម្ពស់កិច្ចការពារ និងសិទ្ធិបរិស្ថាន ការទប់ស្កាត់ការប្រែប្រួលអាកាសធាតុ និងទទួលបានបរិស្ថានស្អាត សម្រាប់ទាំងអស់គ្នា និងដើម្បីមនុស្សជំនាន់ក្រោយ។
#WED2024 #CYN #1000Kmcycling

Credit Picturs by Khem Sunra