កញ្ញា ថុង ឈីងជាវ យុវតីវ័យ ១៨ឆ្នាំ​ ជាកូនស្រីច្បងនៅក្នុងគ្រួសារមានជីវភាពមធ្យមមួយដែលមានសមាជិកចំនួន ៣នាក់ មានទីលំនៅនៅភូមិព្រៃបឹង សង្កាត់កំបូល ខណ្ឌកំបូល រាជធានីភ្នំពេញ។  ឈីងជាវ បានចាប់ផ្តើមស្គាល់សមាគមបណ្តាញយុវជនកម្ពុជាជាលើកដំបូងតាមរយៈការចូលរួមវេទិកាទិវាបរិស្ថានពិភពលោក ដែលបានរៀបចំឡើងកាលពីឆ្នាំ២០២៣ ស្តីពី” រួមគ្នាការពារបរិស្ថាន និងធនធានធម្មជាតិដែលជាទ្រព្យសម្បត្តិរបស់យើងទាំងអស់គ្នា”។ ជាលើកដំបូងនៃការចាប់ផ្តើមស្គាល់សមាគម តាមរយៈសារជំរុញលោក ហេង គឹមហុង ដែលបានជំរុញឱ្យយុវជនកម្ពុជា ចូលរួមសកម្មភាពការពារបរិស្ថាន អភិរក្សធនធានធម្មជាតិ និងអនុវត្តសិទ្ធិរបស់យុវជនក្នុងក្លាយជាពលរដ្ឋសកម្មនៅក្នុងសង្គម។ តាមរយៈការស្គាល់សមាគម និងការចាប់អារម្មណ៍ពីកិច្ចការងាររបស់ប.យ.ក ឈីងជាវបាន ចូលរួមការងារស្ម័គ្រចិត្តជាលើកដំបូងជាមួយសមាគម គឺការចូលរួមធ្វើជាយុវជនសង្កេតការណ៍បោះឆ្នោតសម្រាប់ការបោះឆ្នោតជាតិឆ្នាំ២០២៣ បន្ទាប់មកក៏ចូលរួមវគ្គបណ្តុះបណ្តាលជាមួយនឹងសមាគមដូចជា វគ្គបណ្តុះបណ្តាលពីសិទ្ធការងារ ការគ្រប់គ្រងសុវត្ថិភាពប្រព័ន្ធឌីជីថល សិទ្ធិចូលរួមការងារបរិស្ថាននិងធានធានធម្មជាតិ ព្រមទាំងវេទិកាយុវជនកម្ពុជាជាដើម។

ជាក្មេងស្រីដែលធ្លាប់តែផ្តោតលើការសិក្សាមួយមុខ មិនមានក្តីស្រម៉ៃច្បាស់លាស់ មានភាពខ្មាសអៀនច្រើន និងពុំធ្លាប់បានរៀបចំគោលដៅច្បាស់លាស់ ត្រូវបានផ្លាស់ស្ទើតែទាំងស្រុងចាប់តាំងពីបានចូលរួមសកម្មភាព និងបានក្លាយជាបុគ្គលិកហាត់ការបស់សមាគមចាប់តាំងពីខែវិច្ឆិកា ឆ្នាំ២០២៣មក។ ឈីងជាវបាននិយាយ៖ “ខ្ញុំជាក្មេងដែលចូលចិត្តការសិក្សា និងជាមនុស្សដែលមិនសូវចេះនិយាយស្ដីច្រើនព្រោះតែអៀនច្រើន ណាមួយទៀតខ្ញុំមិនទាន់ដឹងពីអ្វីដែលខ្លួនស្រឡាញ់ពិតប្រាកដ”។

រយៈពេល១ឆ្នាំនៃការហាត់ការនៅសមាគមបណ្តាញយុវជនកម្ពុជា​ ឈីងជាវទទួលបានការពង្រឹងសមត្ថភាពទាំងជំនាញទំនាក់ទំនង និងជំនាញគ្រប់គ្រងគម្រោង រួមមានជំនាញក្នុងការតស៊ូមតិ ការនិយាយជាសាធារណៈ ការទំនាក់ទំនងជាមួយសហគមន៍ វិធីសាស្រ្តស្រាវជ្រាវ ការគិតស៊ីជម្រៅ ការសរសេររបាយការណ៍ ការធ្វើសំណើរគម្រោងថវិកា វិធីសាស្រ្តសម្របសម្រួលកម្មវិធី  ព្រមទាំងក្របខណ្ឌច្បាប់នានាពាក់ព័ន្ធនឹងសិទ្ធិមនុស្សជាដើម។

ឈីងជាវជាយុវតីដែលមានសេចក្តីអត់ធ្មត់ព្យាយាម និងខិតខំយ៉ាងខ្លាំងក្នុងការបង្កើនសមត្ថភាពរបស់ខ្លួនឱ្យកា្លយជាយុវជនសកម្ម។ ឈីងជាវ បានបង្កើនសមត្ថភាព និងភាពក្លាហានក្នុងការចូលរួមយ៉ាងសកម្មក្នុងការអនុវត្តសិទ្ធិរបស់ខ្លួន ព្រមទាំងមានសេចក្តីក្លាហានក្នុងការនិយាយជាសាធារណៈប្រកបដោយទំនុកចិត្ត។ ភាពក្លាហាន និងសមត្ថភាពដែលឈីងជាវ បង្ហាញខ្លាំងគួរឱ្យកត់សម្គាល់អាចមើលឃើញតាមរយៈ សមត្ថភាពនៃការសម្របសម្រួលកម្មវិធីផ្សាយផ្ទាល់របស់វិទ្យុសំឡេងសង្គមស៊ីវិល ជាវាគ្មិនក្នុងកម្មវិធីវិទ្យុរបស់សំឡេងសិទ្ធិកម្ពុជា​ ចូលរួមជិះកង់ដាក់ញត្តិដើម្បីទាមទារបញ្ឈប់ការនាំឈើចេញ ចូលរួមព្រឹត្តិការណ៍ជិះកង់១០០០គីឡូម៉ែត្រដើម្បីបរិស្ថាន  ព្រមតាំងសមត្ថភាពនៃការរៀប និងសម្របសម្រួលវគ្គបណ្តុះបណ្តាល សិក្ខាសាលា កម្មវិធីបោះជំរំ និងទស្សនកិច្ចសិក្សាជាមួយនឹងក្រុមយុវជន ក៏ដូចជាបុគ្គលិករបស់សមាគម។ ឈីងជាវបាននិយាយទាំងមុខសប្បាយរីករាយ៖ “ខ្ញុំពិតជាមានជាមានការផ្លាស់ប្ដូរសាហាវណាស់​ពីមនុស្សដែលមិនមិនមានភាពក្លាហាន មកជាមនុស្សដែលក្លាហានហ៊ាននិយាយនៅទីសាធារណៈបាន​ ហ៊ាននិយាយវិទ្យុទៀត និងអាចសម្របសម្រួលកម្មវិធីបានច្រើនទៀតផង ខ្ញុំតែងតែមានក្ដីសង្ឃឹមថាថ្ងៃណាមួយខ្ញុំនឹងកែប្រែ លូវខ្ញុំធ្វើបានហើយ”។  ខែកក្កដា ឆ្នាំ២០២៤ យុវជនថុង ឈីងជាវ បានក្លាយជាក្រុមយុវជនសម្របសម្រួលសិក្ខាសាលាថ្នាក់តំបន់អាស៊ាន នៅក្នុងខេត្តសៀមរាប ជាមួយនឹងបណ្តាញយុវជនសាកលដើម្បីជីវៈចម្រុះ។ ខែកញ្ញា ឆ្នាំ២០២៤ ឈីងជាវ ទទួលបានឱកាសពីសមាគមដើម្បីចូលរួមវេទិកាសង្គមស៊ីវិល និងប្រជាពលរដ្ឋអាស៊ាននៅប្រទេសទីម័រខាងកើត ព្រមទាំងជាក្រុមការងាររៀបចំសិក្ខាសាលាស្តីពីការពង្រឹងសមត្ថភាពយុវជនអាស៊ានដើម្បីអនុវត្តសិទ្ធិបរិស្ថាន និងសកម្មភាពអាកាសធាតុផងដែរ។

តាមរយៈការពង្រឹងសមត្ថភាព និងឱកាសដែលឈីងជាវទទួលបានរយៈពេលមួយឆ្នាំមកនេះ បានជម្រុញឲ្យយុវជនរូបនេះក្លាយជាយុវជនក្លាយជាមនុស្សផ្លាស់ប្តូរខ្លួនឯងពីមនុស្សស្ងប់ស្ងាត់ មកជាមនុស្សដែលមានទំនាក់ទំនងល្អជាមួយមនុស្សជុំវិញខ្លួន និងមានសមត្ថភាពក្នុងការចូលរួមបង្កើតសកម្មភាពច្នៃប្រឌិតដើម្បីចូលរួមដោះស្រាយបញ្ហាសង្គមជាមួយយុវជន និងសហគមន៍។ ពីក្មេងស្រីដែលមិនស្គាល់ថា អ្វីទៅជាអង្គការសង្គមស៊ីវិល​ បានក្លាយជាក្មេងស្រីដែលស្គាល់យ៉ាងច្បាស់ពីគុណតម្លៃនៃកិច្ចការងារសង្គម និងស្គាល់ពីសារៈសំខាន់នៃអង្គការសង្គមស៊ីវិល។​ នាងថែមទាំងបានយល់ដឹងយ៉ាងច្បាស់ពីតួនាទីរបស់ខ្លួនក្នុងការរួមចំណែកក្នុងការអនុវត្តសិទ្ធិរបស់ខ្លួនក្នុងសង្គម។ ឈីងជាវ បានប្រែក្លាយជាមនុស្សដែលមានភាពចាស់ទុំ មានភាពបត់បែន និងបានក្លាយជាអ្នកដឹកនាំវ័យក្មេងដែលពោរពេញទៅដោយទំនុកចិត្ត។ ប.យ.ក បានជួយឲ្យ្នុងការចូលរួមបង្កើតសកម្មភាព្ននៃនាងរកឃើញពីសក្ដានុពលរបស់ខ្លួន ហើយបច្ចុប្បន្ននេះនាងបានត្រៀមខ្លួនរួចជាស្រេចក្នុងការធ្វើខ្លួនឱ្យក្លាយជាកាតាលីករសម្រាប់ជម្រុញឲ្យមានផ្លាស់ប្តូរជាវិជ្ជមាន។ ឈីងជាវបានលើកឡើង៖ “អរគុណប.យ.កដែលបានផ្លាស់ប្ដូរខ្ញុំទៅរកការផ្លាស់ប្ដូរមួយដែលល្អមែនទែន ជាមនុស្សមានក្ដីសង្ឃឹម និងក្លាយជាដឹកនាំវ័យក្មេង អរគុណប.យ.ក”។